大口湯尋日自爆話上禮拜三收到一封英文電郵，內容大致話有人出錢畀發信人殺佢，而且已經跟蹤咗佢一排，知道晒佢嘅行蹤，今次係最後警告；如果大口湯唔立即匯一萬五千英鎊到某個戶口，結果就會好似九一一恐怖襲擊一樣喎！

得罪人多 杯弓蛇影

任何有睇開《警訊》嘅市民，都應該理解到呢個電郵純粹想呃錢，偏偏大口湯就質疑個電郵咁啱喺政改方案公布當日發出，仲傳咗去好少人知道嘅私人電郵地址，加上之前嘅網上恐嚇疑雲，覺得自己安全受到威脅，於是同其他泛民朋友傾過後，日前決定報警處理。

港島總區重案組初步調查後，發現呢個電郵由一個喺尼日利亞登記嘅電郵地址發出。其實類似嘅呃錢電郵都試過嚟自該國，記得前高官藍鴻震曾被誤傳喺尼日利亞畀人打劫，估唔到連身為資深大律師嘅大口湯都信以為真。可能正如佢所講，自己「得罪人多」，先會成日疑神疑鬼，杯弓蛇影。