本文重點
尋日下晝喺中環撞到港協暨奧委會會長霍震霆等緊座駕，原來佢準備趕上南沙開會，但當時已經四點半鐘，趕到去南沙咪天黑？霍公子好無奈咁話：「係呀！近排公司工作好忙，聽日（今日）又要趕返香港開立法會，二十四小時都唔係好夠用，好彩香港有啟剛同啟山兩個仔幫手，分工合作。」
視乎災情隨時加碼
霍公子除咗兼顧體育同家族生意外，仲要兼多一瓣，就係霍英東基金會嘅工作嘞。最近青海玉樹七點一級大地震引致傷亡慘重，霍公子尋日朝早就以基金會名義捐出五百萬元畀青海災民救急，佢話做慈善都係秉承先父霍英東嘅遺願，仲話稍後會密切留意青海嘅災情，如果有需要，可能會再加碼都未定。
新界鄉議局主席劉皇發尋日都聯同副主席張學明同林偉強等一班鄉紳，以鄉議局名義捐五十萬元畀內地賑災，咁有善心真功德無量。