華人置業董事劉鳴煒早前捐出五百萬元支持新界鄉議局興建新大樓，尋日就搵鄉議局幫番佢，但唔係講錢，而係希望局方支持佢有份發起嘅「香港精神大使」計劃，鄉議局主席劉皇發同鳴煒喺會上仲互笠高帽添！發叔大讚鳴煒「低調做人、高調做事」，樂於助人，係年輕一代嘅佼佼者；鳴煒亦禮尚往來，聲言計劃冇咗鄉議局支持，係代表唔到香港各界喎！
鳴煒一番講話令班鄉紳好受落，但仍有鄉紳對計劃有些少「意見」，質疑計劃候選人最高四十歲嘅年齡上限定得太低，有人話應該定四十五歲，亦有人話索性撤銷年齡限制，事關發揮香港精神係冇年齡限制喎。
不過，發叔就好清醒咁話：「冇可能我幾十歲人去做精神大使吖！」副主席張學明話新界有千幾個村代表，搵啲提名做精神大使唔係難事，成功與否唔緊要，志在參與啫！