搞邊科呀？立法會秘書處尋日發畀議員嘅通告話，早前通知議員答問大會押後，有部分議員曾查詢答問大會可唔可以改期，好讓佢哋可以出席同日同一時間為已故全國政協常委徐展堂舉行嘅追悼會。

唔理徐展堂追悼會失大體

徐展堂係愛國愛港陣營同政界嘅重量級人物，好多政商界名人早前都登晒廣告追悼佢，亦早就知道追悼會嘅日期，而喺立法會議事廳內，唔少建制派嘅議員都身兼全國人大代表同政協委員，亦同徐展堂相交過，當然會去追悼呢位故人啦，呢點煲呔曾冇理由唔知又或者唔記得啩，竟然仲答應喺同日落立法會。

煲呔曾唔識大體不特止，咁做仲陷班建制派議員於不義，去追悼會咩，咁議事廳肯定唔見咗一半人以上，搞到答問大會都流會，實畀人鬧爆啦；唔去追悼會咩，又實在過意唔去。

既然係咁，煲呔曾當然要讓路啦，點知雙方喺未來兩個禮拜都度唔到一個大家同意嘅時段，於是立法會秘書處就應特首辦公室嘅建議，將答問大會押後到五月六號。

依家答問大會再押後多兩個禮拜，就等於畀泛民主派有更多時間去儲彈藥，尤其五月十六號就係立法會五區補選日，亦即係公社兩黨搞變相「公投」嘅日子，答問大會同補選相差只得十日，泛民必定盡地一煲同煲呔曾就政改方案駁火，最好就搞㷫佢，等煲呔曾噏錯嘢，咁就等於幫補選谷票，公社兩黨偷笑都嚟唔切。呢鋪煲呔曾送自己入泛民嘅捕獸器，簡直係自己攞嚟衰！