小白觀點:揪出內鬼酷刑逼供

唐唐飛咗去上海做「世博騷」，佢老哥搵手指篤芒，點知篤極都冇反應，喺眾目睽睽下出醜，認真瘀到爆。其實唔使小題大做嘅，舉凡做親Demo都好易出事㗎啦，不過咁簡單嘅Touch芒科技都唔掂，又好難唔懷疑係咪有人搞鬼。

眾所周知，喺香港做特首着數多多，人工高唔使做已經夠爽，既可以益親家，又可以陰啲陰啲醒細佬，簡直係絕世好工，唐唐係取煲呔曾而代之嘅大熱門，當然好多人想射佢落嚟啦。

呢啲懶高科技嘅Demo，一般老早夾定晒，台上大老細只係作狀篤兩篤，匿喺後面嗰位技術人員夾好時間Click一Click即轉畫面。所以呢，今次好明顯就係幕後代篤嗰個跣佢。不過唔緊要，順藤摸瓜，捉嗰條友出嚟施以酷刑，話唔定當中有個大陰謀，最後供出主謀，原來係一個會打功夫嘅鬍鬚仔都未定。

Blog:http://sunsiupak.blogspot.com

阿豪觀點:丟咗成個香港嘅架

唐唐去上海參觀世博香港展區，梗係要做吓騷啦，佢今次嘗試使用互動裝置，篤其中一個輕觸式屏幕裝置時，竟然要等幾秒鐘至有反應，認真瘀皮！唐唐先被掟鞋，又喺上海出醜，依家風頭火勢，都唔知係咪畀人搞喎！網友講得啱，今次唔係唐唐失威咁簡單，而係丟咗成個香港嘅架。舊年「十．一」花車巡遊，代表香港嘅花車已經畀人鬧勁核突，如果今次香港展區嘅蝦碌嘢仲係冇改善，容乜易喺全世界人面前出醜㗎！

仲有呀，唐唐嘅反應真係麻麻喎，當時竟然手足無措。唉，畀我係佢，梗係第一時間拍枱鬧人啦，起碼可以顯示自己都係「強政勵治」吖嘛！

咁都未止，唐唐仲話打算將香港館永久保留喎……世博主題曲被踢爆抄歌，都即刻宣布摺埋啦，點都唔會宣布發行大碟啩？

Blog:http://lukchiho.blogspot.com

網友觀點

棠棠：唐唐見慣世面，掟鞋都嚇佢唔到，更何況壞鬼芒呢。

卜勤：用番人肉互動咪算囉，搞乜高科技吖，丟人現眼。

檸檬糖：唐唐先出醜，可避免國家領導人參觀時有差池，所以應記一功！

狒狒：香港展區啲裝置咁水皮，出醜嘅唔係唐唐而係香港！