呢嗱，尋日又有的士司機指本港天氣炎熱潮濕，應該喺夏天豁免所有的士停車熄匙，否則會影響業界營運。但環保署有位高官仲死撐，話條例草案已參考加拿大等地嘅經驗，如果加入豁免會令法例名存實亡喎。

叮！香港天氣又濕又熱，當局居然同加拿大呢個風涼水冷嘅地方比較，簡直係九唔搭八。開講都有話，各處鄉村各處例，香港嘅實際環境同人哋天差地別，點樣比較吖？

其實，莫講話的士司機叫苦連天，連執法人員亦被玩殘。譬如話，當局建議每架車一個鐘內有三分鐘豁免時間，到時，司機一見到交通督導員，可以立即熄匙，督導員一走，又可以着番匙，莫非要督導員個個揸住秒錶，喺架車前面等執法？如果係咁，請多萬八人都唔夠啦！

正如有人話齋，交通督導員明刀明槍捉唔到司機，隨時可能要匿喺電燈柱後面鬼祟計時，一分鐘、兩分鐘、兩分半……執法執到咁鬼祟，真係笑爆嘴。仲有呀，當局話就話豁免三分鐘，但口同鼻拗，你話夠晒鐘，佢話未夠鐘，唔通要喺全港街道裝晒大鐘，嚟個標準計時？好似街市咁，整個公秤，防止有人呃秤，咁就真係蔚為奇觀啦！

唉，搞嚟搞去，停車熄匙立法講咗成十年，期間當局諮詢又諮詢、修訂再修訂，最後竟然修出個亂上添亂嘅草案。嗱，公共巴士同業聯會已經講明，會針對法例豁免有客旅遊巴，請人扮乘客。有的士司機團體仲激，警告要發起激烈行動添。一條法例搞咗十年，依然搞到業界怨聲載道，太一叮好想知道，究竟當局係點「諮詢」嘅呢？

講到尾，所謂停車熄匙，根本就係當局閉門造車嘅產物。太一叮建議，一於趁夏天叫晒班不食人間煙火嘅高官坐的士，然後熄埋條匙，睇下佢哋可以忍得幾耐，叮！