女強人過去係硬繃繃嘅代名詞，不過，今時今日就可能變咗好似恒生女大班梁高美懿（Margaret）咁，返工時游走千軍萬馬之間，放工之後，就玩得、食得仲跳得添。尋日Margaret以國際成就計劃香港部主席出席「學生營商體驗計劃」畢業禮，唔止大講營商之道、塞錢落學生袋，仲喺欣賞班學生獻唱韓國人氣組合Wonder Girls最近熱爆全城嘅作品《Nobody》時，企起身好投入咁同佢哋一齊跳。
Margaret雖然日理萬機，但女強人都要抖氣叉電嘅時候。佢同我哋講，喺啱啱過去嘅復活節，佢請咗兩星期假，一家四口一齊去意大利同瑞士旅行。去旅行最怕舟車勞頓，識玩識歎嘅Margaret就選擇自駕遊，免卻轉車同行到腳軟之苦。
佢仲自爆自己喺意大利買咗唔少靚鞋靚衫，又歎咗好多地道菜式同芝士添。Margaret把握機會去旅行叉電，一返香港做嘢時就精力十足，或者呢個就係佢喺金融界嘅成功之道！