本文重點
建仔新星李慧琼係專業會計師，工作之外，仲要兼顧立法會工作，不過，上個禮拜三，政府推出政改方案，建制派即晚搞咗個飯局，據聞西環曾吹雞敦促大家務必出席，以示大團結，為政改護航，點知政壇新丁李慧琼竟然冇晒影。
「媽咪可唔可以返嚟陪我？」
李慧琼梗係唔係未紅先驕啦，亦唔係有心「放飛機」，佢只係唔想犯法啫。佢話，原本同老公制訂咗張完善嘅湊女時間表，嗰晚本來係老公當值湊女，點知老公忽然有事必須外出，而原本想去飯局嘅李慧琼就收到寶貝小公主嘅電話︰「媽咪，你可唔可以返嚟陪我呀？」
做媽咪嘅聽到呢句說話真係心都冧晒，更何況獨留兒童在家係犯法嘅，身為立法會議員嘅李慧琼更加唔敢知法犯法。
好似咁樣湊女大過天嘅情況多唔多？李慧琼都話唔多，事實上佢好少臨時失場，早兩日佢喺立法會開完兩個會後，仲要同黨友議員陳鑑林趕去為青海地震災民籌款，醫肚都係就近喺中環地鐵站嗰間美心快餐買飯盒搞掂咋。