最低工資討論最近因為「廿蚊張」嘅時薪廿蚊論炒熱，仲畀人扯到功能界別議員嘅存廢問題，行會召集人CY梁振英尋日出席一個電台節目時就唔點名話：「功能界別議員問責對象唔淨係界別內嘅選民，而係全個社會，但佢哋有啲時候忽略咗！」
CY話，有啲功能界別議員同業界聯絡好密，希望下次再選時可得到大家支持，但有時唔顧及整體大眾利益，但呢啲係人嘅問題，唔關制度事。佢呢番話引起政圈討論，有建制派人士話，無論代表邊個功能界別，議員都唔應將界別嘅利益放高於市民整體嘅利益，亦有政圈人士話，CY舊年甘冒畀人批評同政府立場唔一樣嘅風險，都要撐最低工資立法，可見佢好着緊呢方面。至於呢番話指邊個，歡迎功能界別議員對號入座！