政圈熱話嘅港台《城市論壇》變咗「維園阿哥」當道，立法會建制派議員驚咗畀人柴台，繼建仔陳克勤險中飛Bra（胸圍）後，富貴黨嘅「廿蚊張」張宇人又被掟廿蚊紙，加上建仔副主席劉江華被包圍辱罵。佢哋早前決定集體杯葛，呢個節目嘅監製即刻訂新規矩挽留佢哋，但建制派決定杯葛今日《城市論壇》。好彩身兼基本法委員會委員嘅民建聯監委會副主席譚惠珠肯頂硬上，與政制及內地事務局局長林瑞麟同全國政協委員劉夢熊，舌戰白鴿黨劉慧卿同公文袋余若薇。
《城市論壇》節目監製兼主持謝志峰曾先後致電民建聯主席譚耀宗、劉江華及自由黨主席劉健儀，話同「維園阿哥」任亮憲等人約法三章，要求佢哋與嘉賓保持五呎距離，動口不動手，亦唔准掟雜物同爆粗，又增加咗三名保安員維持秩序，不過，三個建制派要員都係拒絕邀請。
建仔嘅黃定光狠批港台保障唔到參加者人身安全，話去親都畀人鬧，點解要咁委屈？同屬建制派嘅陳茂波同行會召集人梁振英就話，如果討論議題適合，都會「雖千萬人吾往矣」。詹培忠亦好勇猛話，論壇啲人搞乜嘢都無所謂，佢驚都未驚過，去唔去係要睇心情喎！詹培忠去年喺論壇上不斷被人打斷話柄，曾經憤然離場抗議。