本文重點
政改方案出籠後，泛民陣營齊嗌唔可以接受，仲計劃喺七月表決前搞一次大遊行，向政府晒冷。不過，自從係咪發起「公投」鬧分歧後，泛民陣營立場各異，有關團體想製造○三年七．一五十萬人上街遊行翻版都冇咁易，分分鐘變成N個參加人數得小貓幾隻嘅局面。事關一直主張溫和理性溝通嘅終極普選聯盟決定先拔頭籌，喺五月二日舉辦「踢走爛方案」大遊行，但呢個五月嘅遊行一籮籮，泛民捧場者真係要好有腳骨力至得。
人數分薄 泛民冇戲唱
普選聯嘅遊行宗旨係希望當局交代終極普選路線圖，召集人馮偉華無解釋點解打散晒嚟搞，淨係話二號嘅遊行並冇諗過呼籲市民五月十六日去投票。不過，佢哋前一日，已經有職工盟發起「反貧富懸殊五一大遊行」，計劃由維園足球場行去中環政府總部，呼籲當局立法訂立最低工資為時薪三十三元；而每年五月尾，支聯會又會發起「民主愛國大遊行」，路線相同，所以五月之內最少有三場大遊行。
但係泛民飯盒會日前先決定，如果政改喺七．一前表決，就會喺六月中發動大規模遊行，再次圍堵政府總部，而民陣又年年都有個七．一遊行，所以嚟緊一段日子，泛民嘅遊行活動真係好似車輪轉咁無停手。遊行本嚟有助吸引市民關注、炒熱社會氣氛，但係五月遊行次數過密，可能出現每場都係小貓三四隻嘅分薄勢力效果，令呢場騷更加冇嘢睇。
據講普選聯搶閘搞遊行都有苦衷，事關推遲一個禮拜嘅話，白鴿黨五個議員去咗上海世博，少咗幾個人站台，聲勢差啲；但如果押後到五區補選後遊行，市民可能以為投票表咗態，場面可能仲冷清，所以佢哋寧願速戰速決，話之團體爭崩頭喇。