小白觀點：以德報怨請佢教性教育

日本AV女優蒼井空登陸twitter微型博客網站，我國數以萬計網民卻翻牆做「推友」，約埋五姑娘一齊對住電腦屏幕，同夢中女神「推」來「推」去，不知幾過癮呀。

其實佢哋咁樣做法都係無可厚非，本欄更加要高度評價呢種愛國行為。係人都知中日兩國有血海深仇，凡係有血性嘅中國男人，莫不晚晚匿喺房度，將所有國仇家恨宣洩喺AV女優身上，最弊係呢個對手真係太頑強，教訓完一個，仲有千千萬萬等住被教訓，搞到十萬青年十萬軍都投晒降。

唔緊要，中國人向來都有「以德報怨」嘅優良傳統，正如當年老蔣禮聘侵華日軍老頂岡村寧次返嚟練兵，我哋亦都好應該重金請蒼井空老師過嚟，充當「性教育大使」，等大家睇吓老師拍咗咁多套AV，套套真槍實彈，竟然冇BB要擲落垃圾桶，值得「90後」色情男女好好學習呀！

Email：sunsiupak@gmail.com

Blog：http://sunsiupak.blogspot.com

阿豪觀點：「球迷」印證牆唔存在

內地對網絡嚴格管制，好多網上唔到，要上就要避過官方監察，即係「翻牆」至得。但係最近內地網民掀起一股翻牆熱，但就唔係因為要睇官方認為敏感嘅資訊，而係要成為日本AV女優蒼井空微博嘅支持者，你話奇唔奇？

諗諗吓其實好奇怪，點解蒼井空喺內地咁多「球迷」呢？唔使問，梗係因為好多人欣賞過佢嘅大作啦，好嘞，咁佢哋又從咩途徑睇到嘅呢？照計AV片好難買到正版嘅啫，咁即係話好可能喺網度傳嚟傳去啦，既然係咁，呢個所謂「牆」可能本身都唔係好存在o架啦，今次咁多人成功「衝關」，似乎唔係咁出奇喎。

計豪伯話齋，反正大家都預咗限制多多o架啦，倒不如開誠布公，訂一份詳細嘅清單，講明邊啲係違禁網站，邊啲係屏蔽詞，然後定期更新，起碼大家都叫做有法可依吖嘛！

Email：lukchiho75@hotmail.com

Blog：http://lukchiho.blogspot.com

網友觀點……

羊咩蘇：內地「球迷」翻牆搞到流晒鼻血，辛苦喇！

雀仔：一個AV女優就試出中國嘅網絡防火牆係不堪一擊。

剩佬：多數內地網民都鍾意睇趣味性嘅嘢，使乜管咁嚴！

排骨仔：翻牆技術可能係國內最受歡迎嘅電腦課程。