叮，唔識中文居然識得打「胡佳」兩個字，呃鬼食豆腐咩。計太一叮話齋，就算唔識中文，都知道英文Hu Jintao嘅發音係三個字，點會變成兩個中文字吖。再講喇，就算變成兩個字，一係變成「胡錦」、「胡濤」，一係變成「錦胡」、「濤胡」，點都冇可能扯上「胡佳」o架。「喃嘸老祖」究竟係真糊塗抑或假糊塗，唔使問阿貴嘞啩。

查實，唔識中文係假，有心搞嘢就真，太一叮幾乎可以肯定，成件事係《南早》裏面嘅假洋鬼子所為，今次唔係文字整蠱咁簡單，而係政治大整蠱。試諗下，佢哋個個都唔會搞錯，偏偏將國家主席與一個服緊刑嘅囚犯混為一談，如果話背後冇其他政治陰謀，細路仔都唔信喇。講開又講，堂堂國家主席嘅名譽，居然淨係值《南早》兩吋乘兩吋嘅郵票啟事，都唔知係可笑定係可悲！

話時話，古今中外，透過呢種文字把戲玩弄執政者嘅例子已多不勝數，中國古人就有所謂「諧隱」嘅講法，即係用「諧辭隱語」來嘲諷執政者。勢估唔到，喃嘸老祖呢班真假洋鬼子居然亦識得用「諧隱」呢招嚟詆毀國家領導人，簡直令人眼界大開。

不過，大家不可不知，如果喺古代，好似咁樣詆毀執政者，尤其係將國家領導人同囚犯混為一談，隨時抄家滅族都有之，好似「清風不識字，何故亂翻書」呢兩句詩，清朝時就曾經引起一場軒然大波，唔知幾多人頭落地。喃嘸老祖好命，處身於當今香港呢個三不管嘅地方，港府唔敢管，北大人唔想管，法律管唔到，佢哋先至可以咁明目張膽、肆無忌憚嘅咋。

曾幾何時，香港被稱為臥虎藏龍之地，可惜今時唔同往日，今日嘅香港係臥狗藏奸至真，通街都係走狗漢奸，而且打正招牌添，例如嗰位臭名遠播嘅李漢奸，曾公開宣稱「日日做漢奸」，問你服未。顧名思義，做走狗漢奸，梗係以出賣國家及民族利益為榮，所以，李漢奸要求美國總統向北京施壓唔出奇，壹淫媒反中亂港唔出奇，而喃嘸老祖含沙射影詆毀中國領導人，同樣不足為奇。

香港實行一國兩制，即係「一個國家，兩種制度」咁解，以前有人執台灣口水尾鼓吹「兩國論」，已經夠晒離奇，點知依家仲絕，居然搞咗個「一國主席，兩個名字」出嚟，喃嘸老祖果然創意無限。

有人唔明，點解中國人咁鍾意做漢奸？其實有乜點解呀，正如魯迅話齋，中國人習慣於做奴才，有骨氣嘅人少，稱得上中國脊樑嘅更加係少之又少。只要明白呢個道理，就知道香港點解會成為臥狗藏奸之地，亦知道點解喃嘸老祖呢張不中不西、陰陽怪氣嘅報紙成日喺度搞搞震，今次就話將國家主席稱為「胡佳」啫，點知下次會唔會更陰濕，整個譯名「胡塗」出嚟o架，叮！