立法會尋日首日辯論財政預算案，到咗夜晚差不多七點鐘，立法會主席以有三十人發言為由，提早散會。忽然提早散會，收到風話因為班建制派議員要趕去中總會所參加一個秘密飯局。去到中總會所，果然發現總共有二十六名建制派議員喺度。

據聞飯局原意係傾政改方案，但大家覺得既然大部分建制派都支持方案，認為再冇乜嘢好傾，金勞詹於是提出近期港台「城市論壇」場面失控問題，話與其送上門受靶，倒不如暫時唔上論壇。說畢即群情洶湧，大家七嘴八舌，有苦主呻話以前出席論壇反應都好溫和，能夠暢所欲言，但依家上親去都冇得講，仲要被人圍攻。

富貴黨主席劉健儀話如果航運界有事，佢都堅持會去，但有人勸佢：「大家一齊唔去啦！」有與會者話，最後二十六個議員有共識，就係呢個杯葛行動唔會綑綁式進行，即係各自決定。