尋日政府公布修訂後嘅「冇改」政改方案，連一直有同政府溝通嘅終極普選聯盟都話事前冇收到料，馮偉華話估唔到佢作為普選聯召集人嘅卡片都仲未印好，政府嘅方案已經出街，其實普選聯嘅網頁都係啱啱整好擺上網。唔知卡片同網頁會唔會因為方案嘅面世而成為明日黃花呢？
馮偉華最近接手普選聯召集人同教協會會長兩個位，都係由現任教協會長張文光全力抬佢上轎。對於做教協會長，當然要得到教協元老司徒華嘅支持。馮偉華話同華叔嘅接觸唔多，但從其他教協嘅核心了解到，華叔身為教協監事會主席，喺教協開會經常都會不留情面咁批判其他理事，但總唔會鬧佢。華叔對「華仔」嘅印象，或者由此可知一二。
華叔之前講過教協被滲透嘅問題，馮偉華今次上位夠晒「信得過」。其實馮偉華參與社運二十幾年，八十年代爭取八八直選佢都有份，難怪畀張文光睇中接班。