最近李大壯獲政府委任為港台經濟文化合作協進會副主席，負責促進港台兩地旅遊及貿易，係咪意味兩人有機會再碰頭？不過田少遇到李大壯個名仍然不是味兒，仲有啲面黑添！佢不以為然咁話旅發局自己有做旅遊推廣，「『嗰個會』邊個做主席，有乜嘢關係呢？呢啲純粹都係政府安排同決定！」

嗱！大家有冇留意到，田少由頭到尾都冇提過李大壯個名，連李大壯做主席嗰個會都淨係話「嗰個會」咋！可見佢心裏面對呢個人仲係好火滾，費事同佢拉上任何關係。

田少做咗三年旅發局主席，一洗旅發局大花筒風氣，來港旅客數字有增無減，成績有目共睹，佢認為「只要做得好，就應繼續做」，所以有傳言話佢放棄參加立法會補選，以換取旅發局主席連任，田少就真係「聽咗得啖笑」。佢講笑咁話，政府咁想政改通過，應該掉番轉叫佢參加補選，等佢當選幫政府攞多票。