小白觀點：乖乖等死勿為改而改

《南華早報》頭版好搞嘢，明明見到張相係國家主席胡錦濤，英文亦係President Hu Jintao，但括住嗰個中文名竟然係「胡佳」！胡佳係何許人也？如果聯想到奧運跳水冠軍還好，但唔知點解，好多人即刻諗到因觸犯煽動顛覆國家政權罪被囚三年嘅嗰位維權人士。屈國家主席煽動顛覆國家，相信係香港報業史上嘅一大創舉。

《南早》話喎，處理呢單新聞由記者到編輯以至校對，所有經手人都唔識中文，係人為疏忽。不過本欄就認為，錯幾個字係乜問題吖，反正依家都冇乜幾個香港人會買西報睇，《南早》繼續求求其其等死咪算囉，千祈咪夾硬要吸取教訓為改而改，搵成班中文教授返嚟坐館，否則下次再整多個頭版，Hu Jintao串啱，（胡錦濤）亦冇錯，但睇真啲，咦，個職銜好似唔多對辦喎，因乜解究變咗做Prisoner Hu Jintao嘅？

Email：sunsiupak@gmail.com

Blog：http://sunsiupak.blogspot.com

阿豪觀點：下次到奧巴馬變拉登

《南華早報》出現極大嘅蝦碌，佢哋喺頭版出咗胡錦濤嘅相，但係圖片說明竟然寫成異見人士、冇耐前至被判入獄三年嘅胡佳。嘩！你話寫錯成胡兵或者胡軍就話啫，咁寫錯法，未免敏感啲啩……

今次佢哋真係水洗都唔清，本來佢哋可以解釋，話此胡佳不同彼胡佳，係講緊同名同姓嘅國家隊跳水運動員，但咁咪即係承認自己係有心出錯？

其實真係好離譜，兩個人名，一個係三個音節，一個係兩個音節，有咩理由搞得錯呢？難為佢哋仲諗出一個非常冇諗頭嘅解釋，話處理呢單新聞嘅人全部唔識中文喎！唔識中文學人哋登番個中文名，仲有冇不負責任啲呀！

嗱，《南早》下次不妨將奧巴馬串做Osama（即係拉登），以此證明佢哋亂咁報道係不分國籍嘅，佢哋蝦碌事件簿成尺厚，錯多次又有咩所謂吖！

Email：lukchiho75@hotmail.com

Blog：http://lukchiho.blogspot.com

網友觀點……

胡塗：喺頭版出現咁離譜嘅錯誤，認真少見。

駱駝祥：將國家主席當作政治犯，唔通《南早》想暗示啲嘢？

阿懵：就算鬼佬做校對，都冇可能唔識國家主席個中文名啩……

賴先生：其實《南早》可以話自己個電腦系統畀黑客入侵咪得囉。