現年三十八歲的黃太○三年在瑪麗剖腹產子，「醫生好資深，我仲以為瑪麗係全港最好嘅公院，估唔到六年後會有咁離譜嘅事發生喺我身上！」去年黃太懷有次女，遂不畏長途跋涉之苦，再選擇由將軍澳跨區到瑪麗分娩。

顧問醫生仲話「算好彩」

黃太憶述，去年六月二十六日入院接受半身麻醉剖腹分娩，上午十一時入手術室，女兒十二時零七分出世，但過了很久手術仍未完成，便向女醫生查詢。醫生承認開刀期間割傷膀胱，一名泌尿科醫生趕來修補，手術延長至三小時。

黃太分娩後三日向一名婦產科顧問醫生查詢，始獲悉膀胱傷口長達五厘米，正常膀胱只有約五厘米大，「佢都承認基本上係成個膀胱切開咗，仲話好彩冇傷到尿管同排尿出口，如果唔係會腎炎同失禁！」黃太與丈夫要求與操刀的女醫生聯同資深婦產科及泌尿科醫生會面，女醫生承認「落刀時根本唔知嗰度係膀胱，所以一刀切咗落去；佢一講完呢句即刻畀資深醫生截住，我驚訝到眼都爭啲跌咗出來！」

「半個鐘已經急到想瀨」

黃太留院期間，日日插尿喉及帶尿袋，「好痛好辛苦，好似人間地獄咁！」出院後亦飽受尿頻之苦，「由瑪麗坐的士返屋企約半小時，已經急尿急到想瀨！」黃太現時每半小時至一小時須小便一次，不敢多飲水，每次小便僅有百多二百毫升，比正常三百多至四百毫升少一半，更需長期覆診。

「醫醫相衞真係好黑暗」

黃太去信瑪麗投訴，只獲回覆因首胎剖腹時子宮附近有黏連，令第二胎剖腹容易傷及其他器官，「醫生同瑪麗一句道歉都冇，醫醫相衞，真係好黑暗。」

病人互助組織聯盟副主席張德喜直斥事件離譜：「器官都未搞清楚就做手術，令市民好恐慌，瑪麗要解釋清楚！」

瑪麗醫院昨回應表示，負責剖腹手術的醫生「富有經驗」，又指手術前已將風險及有關的併發症向黃太解釋。