嗱，BB仔一出世，就有可能畀人戴錯隔籬床嬰兒條手鈪，做咗人哋個「哎吔」仔女；又或者無端端沖個「超溫暖」熱水涼，淥到皮都甩；大個咗有乜冬瓜豆腐，睇一次病排幾粒鐘，見醫生得幾分鐘，仲隨時可能斷錯症、畀錯藥。捱到老仲慘，專科門診閒閒地輪幾個月，未等到已經唔掂。就算兩腳一伸，亦未必可以安息，唔好彩畀人調亂屍格，化咗灰至被發現搞錯咗，臨到尾都走得唔安樂。

叮！人生四苦，苦上加苦。喺曾蔭權政府管治下，市民搵食艱難，睇病更難。公共醫療系統因為高層管理無能，資源錯配，導致醫護人員嚴重流失，結果服務愈來愈差，醜聞愈來愈多，士氣愈來愈低。港人曾經引以為傲嘅公共醫療已經變晒質，成為國際笑柄。

呢嗱，醫療服務最為人詬病嘅就係睇病難，就算急症都要排餐懵。如果睇專科更慘，輪候一頭半個月不過係「最低消費」咋。根據醫管局數字，○七至○八年期間，八項專科門診嘅輪候時間中位數係七個禮拜，最長嘅要等三年零三個月。咁等法，輕症都變絕症啦。

睇病好似要政府施捨咁，同做乞兒有乜分別？無計啦，家陣公立醫院人手短缺愈來愈嚴重，前線醫護因為工作環境差，工作量太大，爭相劈炮唔撈，資深醫生同護士更加係買少見少。根據醫管局預測，到二○二二至二○二六年，醫護整體流失率會去到百分之五點二。

需求愈來愈大，醫護愈來愈少，求過於供，服務質素點提高呀？睇吓近排不斷爆出嘅醫療醜聞，就知道乜回事啦。由舊年八月到今年三月，公立醫院先後有六位病人懷疑死於醫療事故，幾乎一個月出一單。望番醫管局嘅《風險通報》，淨係醫護人員唔小心擺烏龍，手術後留喺病人體內嘅「免費禮物」，已經嚇死你。留低一塊紗布、半橛膠管已經算「正常」嘞，成個電話聽筒咁大塊手術用銅板，一樣有得「送」。

醫療制度病入膏肓，難怪中大民調話香港唔係和諧社會。問題積重難返，根源只有一個，主管全港醫療衞生嘅食物及衞生局局長周一嶽對公立醫院存在嘅問題充耳不聞，對醫管局失職縱容護短。呢，《風險通報》連邊間醫院出事都冇披露，報啲唔報啲，畀市民狂炳。佢居然死撐話，如果通報同處分機制太苛刻，可能令醫護人員唔敢上報喎。

按周一鑊嘅邏輯，公共醫療搞成一鑊泡，唔係因為醫管局無能，更加唔係佢領導無方，而係因為市民要求太高、太苛刻；就算有人抬屍去禮賓府抗議，亦唔表示煲呔曾施政有問題，係市民太激啫，香港依然「和諧」。真係叮得佢少！