呢排但凡同「80後」有關嘅話題都備受關注，尋日第二十七屆大專辯論賽決賽，辯題都係「香港『80後』上位難」，反映社會對呢班後生仔嘅處境好關心，嗰啲「40後」同「50後」嘅評判仲現身說法，話佢哋後生時只會埋頭搵工同做嘢，唔會諗上位嘅問題。
評判之一嘅行政會議成員兼大學教育資助委員會主席查史美倫，就慨嘆佢後生時只諗過搵份工，尋找自己嘅價值，然後將份工作做到最好，冇諗太多上位嘅嘢。佢唔明點解依家上位變得咁重要，可能係啲人對上位嘅期望提升咗。
既然價值觀同期望都唔同咗，係咪叫班「80後」降低期望就可以解決問題呢？咁就真係要考吓政府嘅政治智慧喇！
另一名評判、廣播處長黃華麒話，佢嘅仔女都係「80後」，所以佢好明白依家年輕人所面對嘅困難。佢又話自己係喺《獅子山下》年代出世嘅人，第一份工作就係做廣播員，當時由朝做到夜晚十一點至放工，係佢自願嘅，而且個個都係咁。
不過，佢一啲都冇睇小時下嘅年輕人，仲讚揚尋日出賽嘅學生辯才好，如果佢當時有咁嘅天分，再加埋勤力，相信前途無可限量喎！