教協尋日完成領導層改選嘅點票程序，唯一候選班底「馮偉華閣」獲得九成七信任票，無風無浪當選。馮偉華接替張文光當選會長，五月正式上任，任期為兩年，而張文光就退居二線，做副會長輔政，亦意味佢坐咗近二十年嘅立法會教育界議席好大機會要退位讓賢，而今次交棒，將令白鴿黨喺立法會嘅版圖面臨進一步萎縮危機。
講起參選立法會，馮偉華話會考慮三個因素，即會員支持度、兼顧教職同家人睇法，但強調若教協需要佢，佢就會去做！即係話，佢對參選已做足心理準備。
馮偉華唔抗拒做議員，但相當抗拒入政黨。佢話至今未有政黨邀請佢加盟，至於最終會唔會做白鴿，佢話到真係向佢招手時至算。不過，聽佢嘅語氣，似乎對加盟一事興趣好冷淡。原來佢喺八十年代時都係匯點成員，但對政黨一向有戒心，當匯點同港同盟合併，變身白鴿黨，佢就全身而退，只論政，不參政。所以，自斷政黨之路二十年，今日要佢食回頭草，真係唔係佢杯茶。
白鴿黨手握教育界議席二十年，當然唔想一夜失去。據聞白鴿黨打算盡力游說馮偉華加盟，延續該黨喺呢個界別嘅影響力，呢個亦係張文光未來兩年嘅重要任務。可惜，睇形勢，白鴿有心，襄王未必有夢。