有航空公司近日推出直飛米蘭航線，喺復活節仲搞咗個五十人嘅尊貴團，同行嘅有立法會議員「象哥」黃定光、「肥仔明」李華明、「橄欖」陳鑑林等，仲有行會成員，連運輸及房屋局副局長邱誠武都有份。
呢次象哥有重任在身，就係要做「購物大使」嘞，落機後一有空檔就去掃LV、Miu Miu同Chanel，購入多個春夏季新款手袋送畀太太同囡囡。使咗幾多錢呀？佢話係秘密，總之就大出血喎。佢闊佬家人但慳自己，轉去米蘭特賣場尋寶，買到三套Hugo Boss西裝同三件冷衫，埋單唔使四千五百蚊港紙，平到笑。佢仲有感而發，話香港應該大搞名牌特賣場喎。
大會安排半日時間欣賞米蘭湖景區，肥仔明話嗰度景色驚艷，但天公不作美，落起雨嚟，大煞風景；而橄欖就欣賞米蘭人熱情好客。