尋日吳斌出席大專辯論比賽做評判時，被問及繼任人問題時竟一反常態，忽然封嘴唔願多講，話有關繼任人嘅問題最好問番個人資料私隱專員遴選委員會主席查史美倫，自言要講嘅早已講過晒喎。

政府恨不得佢快啲走

私隱專員公署亂花公帑、行政混亂嘅情況存在已久，吳斌喺○五年八月接替鄧爾邦做專員時，要處理前署理個人資料私隱專員林永康被揭大花筒嘅爛攤子，點知舊年審計署查出吳斌上任後嘅情況一啲都冇改善，如豪花公帑為前專員鄧爾邦搞歡送派對，吳斌之後仲喺審計報告呈交立法會審議前偷步回應，結果畀立法會政府帳目委員會斥責。

吳斌做專員表現係點，大家有眼睇，而佢經常自把自為，多次畀立法會議員狂轟兼鬧爆；跟住成日呻窮，又話要擴權，搞到成日同政府針鋒相對。依家臨別秋波，可能自知冇資格對下任專員指指點點，以免再口舌招尤，令人反感，所以咪少講為妙囉。

咁唔做專員後有乜搞作呀？吳斌話自己以前玩開田徑，接力賽時會用盡全力跑到交棒嗰秒，佢本住呢份田徑精神，依家全力處理公署事宜，希望順利交接。

問佢擔唔擔心政府好似早前慢半拍委任林煥光做平等機會委員會主席咁，令平機會出現主席真空期時，吳斌就即刻無奈苦笑。

咁又係，政府依家擺出嘅態度係恨不得佢快啲走，當吳斌一公布唔尋求續任，政府就好罕有咁反應奇快，拿拿臨成立四人遴選委員會公開招聘新專員，吳斌一諗到政府嘅反應，除咗苦笑，真係唔知講乜好嘞。