小白觀點：一堂寶貴嘅學前教育

瑪嘉烈醫院爆出「滾水淥B」醫療事故，有個失魂護士幫男嬰沖涼嘅時候，竟然冇試清楚水溫就浸落去，結果將人哋個心肝寶貝淥到下身通紅脫皮，超過一成皮膚被二級燒傷，真係無陰公咯。

不過話時話，今次小朋友無辜辜被淥傷雖然係好慘，但未嘗唔係一個寶貴經驗。周一嶽曾經話過，設立醫療事故通報機制嘅目的，係「希望讓市民了解入院風險」，冇錯，今次BB仔出世三個月就要了解入院風險，雖然係早咗啲，但如果家長睇開啲，就當係周一嶽叔叔送嘅一堂學前教育，等佢明白凡事都有風險，只不過入公立醫院嘅風險特別高咁解。

醫療失誤真係要幾離奇有幾離奇，趁早做足心理準備，以後就算咁唔好彩撞正止血紗布留肚呀、尿喉碎片留膀胱呀諸如此類，都可以處之泰然嘛。

Email：sunsiupak@gmail.com

Blog：http://sunsiupak.blogspot.com

阿豪觀點：基本常識唔使人哋教

瑪嘉烈醫院一名護士懷疑為一個三個月大男嬰沖涼時，冇試清水溫就將BB放落水，結果搞到男嬰下體同臀部二級燒傷。嘩，咁細個就成為公立醫院受害者，都咪話唔驚！

許冠傑首《半斤八両》都有唱啦：「半斤八両，仲慘過滾水淥豬腸……」成年人都嗌頂唔順，更何況係一個初生嬰兒？不過話時話，成日都講醫療失誤，豪伯覺得開始有少少濫用咗呢個Term。正如嗰陣時內地出現三聚氰胺毒奶粉，有人怒問內地企業良心何在，但係諗深一層，唔生產有毒食物害人，唔關有企業良心事，而係做人嘅底線。

同BB沖涼前先Check吓水溫，係基本常識；做完手術攞番啲工具，唔好留低「紀念品」畀病人，亦只係反映做人有冇手尾，同醫學根本無關。如果呢啲嘢都要喺護士學校、大學醫科度教，咁就真係悲哀囉……

Email：lukchiho75@hotmail.com

Blog：http://lukchiho.blogspot.com

網友觀點……

阿甘：若醫護人員將病人視為親人，多啲愛心，意外事故肯定少。

谷氣哥：唔知仲有幾多較輕微嘅醫療事故被隱瞞咗呢？

病貓：依家有病唔只擔心病情，仲怕醫療事故會發生喺自己身上。

賓仔：每次出事例必致歉同徹查，但事故總係不斷發生……