政府○八年用七千幾萬買咗十七架法國造嘅新油壓升降台消防車，首批九架舊年八月到貨。點知消防處驗收至發現，呢啲每架四百三十幾萬嘅法蘭西車原來係「發瘟車」，根本唔用得。問題喺邊？簡單啲講，就係「近水救不了遠火」。

咪以為太一叮自創成語呀，啲消防車架架好似前列腺唔多妥，塞住塞住咁，射出嚟啲水柱軟弱無力，射程唔夠遠，點拉喉救火呀？車已到埠，米已成炊，惟有急Call生產商派人由法國飛過嚟Check吓，一睇至發現大鑊，政府物流服務署竟然買錯車。

射水變淋水，明顯係水泵唔夠力，原因係引擎油溫過熱拖慢轉速，要逐架新車加裝冷卻器降溫去解決。搞咗一大輪，當局至發現呢啲歐洲車根本唔適合香港潮濕炎熱嘅天氣，一嚟到就「水土不服」。

另外，新車一條吊臂垂下籠架時，其中一個出水位會受阻，消防員要調校過至可以開水救火，可能會阻慢救援。因為問題多多，呢批新消防車到埠七個幾月都唔用得，到依家都未投入服務。

叮！本港消防裝備落後又殘舊早已為人詬病，由○七年至今，已經先後有四位消防員喺救火期間因公殉職，如果設備先進啲、充足啲，部分悲劇本來可以避免。但呢頭前線消防員開工搵命博，嗰頭物流署採購消防車一味斷估，未搞清楚款車適唔適用於香港就訂貨，卒之得物無所用。

買對鞋都要試吓啱唔啱腳啦，何況係採購關乎市民身家性命財產同消防員安危嘅火燭車。人命關天，點可以咁兒戲㗎？如果署方招標採購之前多徵詢專家意見，了解吓前線消防員嘅需要，就唔使搞到一鑊泡，令港府成為國際笑柄啦。

政府採購兒戲已經唔係新聞。呢嗱，舊年五月當局就畀人踢爆，物流署購入嘅二十幾架平治客貨車，新車落地不足三個月，就發現連接真空泵嘅喉管出現問題，可能會導致煞車系統功能減弱，對途人構成危險。

除咗求求其其之外，物料採購仲鬧出唔少笑話。政府文娛設施洗手間同公廁提供嘅廁紙舊年被發現貨不對辦，物流署唔理，康文署居然諗到搵手下做「廁紙鑑證專家」，負責檢測康樂設施嘅廁紙長度、重量以至有冇含雜質。

政府物料設施採購管理亂成咁，仲有乜大鑊爆唔出？橫掂有納稅人埋單，買九架消防車返嚟齋擺大半年，濕碎啦。其實要改善亦唔難，如果買錯嘢要扣人工嘅話，呢班「買辦」一定會眉精眼企醒到痹。叮！