本文重點
擴大問責制以高薪請返嚟嗰隊「八國聯軍」副局長同政治助理，一直被外界狂轟係政治實習生，尤其係班政助成日唔見人，收埋自己唔知做過乜，市民認知度低到近乎零，佢哋上場接近兩年，毫無寸進。
唔知係咪習慣收埋自己喺辦公室，少見陽光，所以呢班政助好似「見光死」咁，以民政事務局政助Caspar徐英偉為例，平時低調到大家唔多記得佢，但畀佢曝光都好「擇使」。
尷尬伸脷失儀
尋日佢喺一個禁毒活動上致辭，只係分幾鐘貨仔啫，佢講得有啲生硬，仲要當眾拎住大大張A4紙大細嘅「貓紙」出嚟讀，點知有貓紙仲要讀錯，將「在座」讀成「昨座」，講完連佢自己都知道瘀爆，當場尷尬伸脷，咁就更加失儀啦！
話時話，啲政助平時要同各政黨或者社團溝通，游說佢哋支持政策，冇三寸不爛之舌，都應該好talk得先啱㗎，但睇番Caspar尋日嘅表現，連分幾鐘嘅演辭都記唔住，實在好差勁，睇嚟佢真係要搵方法加強吓記憶力喇，唔係點出得大場面呀！