本地嘅經濟學者一直覺得財爺鬍鬚曾唔識理財、唔識經濟，大家原先以為佢會慢慢上手，今年應可大刀闊斧謀劃吓長遠發展，點知佢竟然放軟手腳，預算案連政府自己提出嘅六大產業會點樣發展都冇晒影，咁仲點會奢望佢餘下兩年任期會有突破性表現吖。鬍鬚曾等收工，班學者惟有發起自救行動。
聽講佢哋近嚟埋班準備搞份「民間預算案」，科大經濟系教授雷鼎鳴同浸大經濟系前系主任鄧樹雄都有參與其中。佢哋嘅最終目的，係將「民間預算案」搶先喺鬍鬚曾公布第四份預算案前公布。
「民間預算案」上月中已經開過一次論壇「試水溫」，睇吓各界反應如何，點知除咗有學者同專業人士參與之外，唔少社福界團體都起晒哄話有興趣，因為佢哋已經信唔過政府有心改善香港貧富懸殊嘅問題，必須出手自救。佢哋先會批判鬍鬚曾過去三份預算案，盡數當中嘅不足之處，唔少人覺得鬍鬚曾冇心又冇諗頭，年年只識「派糖」，做壞手勢，令到下任財爺有跟風壓力，之不過「派糖」又唔到位，令各階層市民為之氣結。
其實財爺多年嚟都有同經濟學者有傾有講，呢班學者如果啱傾嘅都甘願做政府智囊，實為雙贏之局，今次學者同鬍鬚曾反枱，可謂打破傳統、締造歷史嘞。