前日消防處一哥盧振雄接受下屬挑戰，親自落區去觀塘消防局，話了解吓班手足嘅辛苦，點知變咗迷你答問大會，反應仲好熱烈，結果當日休假嘅盧Sir一見就見咗四十幾人，聽足十二粒鐘，由早餐食到晚飯。班伙記講咗啲乜呢？原來包括咗要活化消防局。
有消防員反映話，觀塘消防局喺一九六一年建成，已經有半世紀歷史，好多地方都好殘舊，亦唔多夠位，一啲大件啲嘅儀器都放唔到。盧Sir話會向其他政府部門反映，睇嚟遲啲可能會約見發展局局長林鄭月娥，今次真係愈搞愈大嘞。
好多伙記都覺得盧Sir落區多少有啲似做騷，但亦都覺得咁樣傾可以坦誠啲，但究竟有冇用就要遲啲至知。咁梗係啦，總好過之前嘅諮詢會咁，攞部攝錄機對住吖！
至於向佢下戰書、邀請佢落區嗰位總隊目，原來同盧Sir一樣係基督徒，佢仲送咗個十字架畀盧Sir添，一笑泯恩仇。