唔知係見箍煲不成，費事再拋媚眼吖，抑或係愛之深、恨之切，Jeffrey尋日身在韶關都隔空數落富貴黨，仲好不留情面添！Jeffrey提起呢件事，初時話「廿蚊論」搞到滿城風雨，佢作為前黨員都戥富貴黨傷心，仲有啲心噏添，睇嚟都有啲念吓舊情，點知佢愈講愈激，跟住直情變咗好似哥斯拉咁噴火狂燒富貴黨。

佢分析件事時，覺得富貴黨處理危機唔係咁好，事關廿蚊張發表言論五日後至出嚟回應，實在太慢喇，而且想幫手嘅人又一人講一句，愈描就愈黑，根本唔應該咁多人出嚟講咁多嘢，加上有人退黨又唔認，畀人踢爆後慘變另一危機。

唔一定歡迎對方逃兵

咁都未夠，佢強調經濟動力同富貴黨並非對立，亦唔好認為經濟動力想搶富貴黨啲黨員，佢話：「就算有前富貴黨員想投靠經濟動力，我都要諗過先呀，睇吓係咪有相同理念，係咪想攞威攞彩，我唔希望畀人上綱上線話我哋想搶富貴黨嘅成員，亦唔希望畀人過橋攞着數！」

嘩！各位看官點睇呀？想向經濟動力叩門嘅富貴黨逃兵真係要諗清楚喇，因為聽落人哋當正你哋係籮底橙，甚或係負資產喎！甚至撬都嫌嘥力。

政治圈冇永遠嘅朋友，亦冇永遠嘅敵人，Jeffrey踩得咁盡，因住風水輪流轉，山水有相逢呀！