小白觀點:議員形象今非昔比
有日如果你行街見到有架車掛住個立法會Logo，千祈咪以為一定係尊貴議員嘅座駕呀，原來只要有門路識人，隨時都可以買到個車徽。不過呢位仁兄又真係唔知碇，喂，依家啲議員嘅形象已經今非昔比，掛咗唔止冇着數冇特權，慢吓手仲有意想不到嘅反效果添呀！
你知啦，好多議員選前選後兩個樣，之前笑騎騎乜都應承，選完之後水鬼升城隍，比特權分子更特權分子，真係睬你都傻。每月袋幾皮嘢，終日行行企企，開會唔係鬧事搞黨爭就係閉目瞌眼瞓，「監察廢官」變咗「同流合污」，稱呼市民少，得罪窮人多，如果畀人誤當係廿蚊張嘅座駕，哎唷，咁就恭喜你嘞，換定新車都得咯。
如果閣下真係對立法會車徽情有獨鍾，唔掛唔舒服嘅話，我建議你同時投個「CHEUNG20 PK」自訂牌，肯定可以逢凶化吉，話唔定有人幫你免費抹車添呀！
Blog:http://sunsiupak.blogspot.com
阿豪觀點:私下轉讓缺乏監管
有架私家車掛住個立法會Logo，大模廝樣咁隨街泊喺禁區度，大家會點諗呢？一定會覺得呢條友梗係恃住自己係議員，就以為可以無視交通規則打橫行啦！
咁諗法，可以話啱，又可以話唔啱。立法會方面解釋，只有事先登記車牌先至可以使用立法會停車場，淨係掛上立法會車徽係冇任何特權嘅。只不過咁喎，事實冇特權啫，但係你又點知人哋點諗呢？情況就好似你着住警服去士多買嘢，都唔係可以隨便攞人哋啲貨啦，但係難保冇別有用心嘅人着住嚟招搖撞騙喎。
所以呢，警察制服有好嚴格管制，外人唔能夠隨便喺街買到，但係立法會車徽就唔同嘞，據聞係可以私下轉讓嘅，所以呢鑊嘢，立法會難逃監管疏忽之責也！
唉，家陣立法會議員嘅支持率每況愈下，形象已經夠低落，睇嚟立法會真係要拿拿聲跟進呢單嘢！
內地食品工業又有新猷，今次係喺渠道撈番出嚟循環再用嘅潲水油。雖然專家話毒性比砒霜強一百倍，但係老實講，依家內地食品樣樣都話有害，潲水油都算比較環保㗎喇！
嗰啲所謂專家又係衰嘅，冇嘢搵嘢嚟做，大家食得高高興興，你突然話大家原來飲緊坑渠水，真係情何以堪呢？
呢單嘢無聊就無聊在，你指出啲食油好有問題，另一方面又話冇方法可以check到，情況就好似話你聽依家通街都係偽鈔，但係無論用紫外光又好咩都好通通驗唔出，試問除咗引起群眾恐慌之外，又有咩用處呢？
依家咩都假，如果我開內地食肆，實會學吓啲髮廊咁—唔好心邪，唔係有另類服務—容許顧客自帶食油嚟幫襯，至於會唔會買到假嘢，咁就貴客自理喇！
Blog:http://lukchiho.blogspot.com
網友觀點
小蟲：咁尊貴嘅立法會車徽，假如掛咗喺黑幫大佬架車度，又幾諷刺噃！
賓仔：立法會咁唔環保，其實可以回收番啲車徽再用吖！
豬八：好心啦，立法會議員一係成日掟蕉，一係保皇黨，掛出嚟都醜呀。
羊咩蘇：立法會車徽若係高價轉讓，表示尊貴程度冇減。