消防處處長盧振雄表示，處方會盡力做到消防員有良好設備同培訓，希望大家「平平安安返工，齊齊整整放工」。講就好聽喇，可惜講人自講，純屬吹水。正如有消防員話齋，處方至今未做到無線電通訊一人一機，係因為管方官僚所致，令員方非常失望。不過，員方失望係員方嘅事，盧振雄話喎，現時無可能做到一人一機。

叮！一人一車就難啫，一人一機又有幾難呀？消防設備關乎人命，絕對唔慳得，如果唔夠錢，咪要求政府增加撥款咯，如果係技術上嘅問題，咪盡快諗辦法解決咯，有乜嘢咁難噃！

其實，辦法唔係冇，只係當局唔見棺材唔流淚。盧振雄聲稱，做唔到一人一機係因為現時嘅火場運作模式無法配合，處方正研究有無新模式可以配合。但問題係，消防設備落後唔係今時今日嘅事，到底處方仲要研究到幾時呢？有消防員批評，已經做咗十二年消防員，但通訊設備不足嘅問題到依家都未解決，即係話，根本唔係難嘅問題，而係懶嘅問題。

記得○七年，消防員黃家熙喺品質工業大廈火場殉職，當時死因庭已要求消防處盡快更新設備，消防處亦誓神劈願承諾舊年年底改善通訊系統。但實情係，直到上月長沙灣大火，新通訊系統依然未有得用。講到底，答問大會只係形式，關鍵係要快快趣趣解決問題，如果唔係，就算開多一百次答問大會都係嘥氣。

更加騎呢嘅係，消防人手不足，招聘困難，消防處嘅「解決方案」居然係降低新人入職嘅體能測試要求。盧振雄解釋，處方會透過培訓令新入職嘅消防員體能達標，強調質素唔會下降喎。

消防員質素會唔會下降，依家仲未知，但太一叮想提醒盧振雄，要解決前線人手不足，移船就磡係冇用嘅，甚至可能弄巧反拙添，最有效嘅辦法就係坐言起行，盡快改善設備，保障消防員安全，唔係嘅話，想搵人投考消防員都幾難，叮！