小白觀點：練好體能火場自救
因應新一代嘅體能愈嚟愈唔掂，消防處經常請唔夠人，盧振雄確係有計，降低入職體能要求咁咪得囉。唔係啩，遲啲可能只要做兩下掌上壓，已經可以稱得上係消防鐵人。
係人都知消防要滅火救人，一向體能要求好高，點可以隨便削足適履㗎？你知啦，依家啲白車成日死火，消防員隨時要做埋人肉白車，跑幾公里抬傷者去醫院，少啲體能都唔掂呀！仲有呀，咁之前因為體能差些少考唔到嘅朋友，係咪可以申請司法覆核，要求消防處請番佢哋呢？
不過，睇嚟消防處今次都係勢在必行，小白老弟認為，求人不如求己，小市民都係時候要提高一下自己嘅體能，日日跑幾里路，做一百下引體上升操Fit啲。為乜？一來可以係危急之中自救，如果仲有餘力嘅話，唔該幫手救埋幾個孱仔消防員出災場。
Email：sunsiupak@gmail.com
Blog：http://sunsiupak.blogspot.com
阿豪觀點：裝備輕啲將貨就價
消防處宣布，由今個月起降低投考門檻，放寬四項入職體能要求，包括以往最難的「負重下蹲」測試，即背負和自己體重相同的物件再蹲下的項目，改為立定跳高，而原有嘅一分鐘仰臥起坐要求次數將會提升。
各位網友聽完之後會唔會擔心影響消防嘅服務質素？當然啦，消防處一定唔會認係將貨就價，又強調入到學堂之後，會好似以前一樣經過嚴格訓練。哦，理論上當然可以啦，教育都有「寬進嚴出」嘅概念啦，即係話，等有志投身消防事業嘅人有機會入職。但問題係，如果第時好多人被「踢出校」，傳出去咪一樣會嚇到班人唔夠膽報考！
無可否認，依家啲人的確係孱弱過以前，不如咁啦！睇怕惟有將氧氣樽等裝備做輕啲，最好好似手機咁愈出愈細，咁到時消防員咪唔使咁大隻囉！
Email：lukchiho75@hotmail.com
Blog：http://lukchiho.blogspot.com
網友觀點……
狒狒：以往考生體能頂得順，唔通依家啲人捱唔得苦？
火龍果：若降低門檻後照舊唔掂，咁係咪又再降呢？
阿水：消防處簡直削足就履，新一代消防員點畀到市民信心呀？
周仔：依家救火裝備已差，加埋體能差，咁就死得人多！