行政會議成員「金刀梁」梁智鴻醫生醉心公職，老婆大人曾經踢爆佢嘅財物一個皮篋就裝得晒。不過，金刀梁都好有投資頭腦，咁多年嚟未停過將彈藥攞嚟買樓，今年初又以老婆名義喺中西區添置咗一個住宅物業，令佢同老婆名下嘅物業增至七個。呢啲物業除咗一個喺倫敦之外，其餘六個都喺港島區，而且仲集中於中西區。
近排樓市係咁升，金刀梁嘅身家肯定水漲船高，問佢有乜投資心法？金刀梁好低調咁話好耐無買樓，啲物業唔係自己住就係畀外父住，無咩投資心得喎。
不過，佢承認老婆有時會買賣物業嘅，梁太最近喺中西區買咗個住宅物業，講明作出租用途，今年二月，金刀梁已向行會作出最新利益申報。過去金刀梁買落嘅物業都係夫婦共同擁有，今次就係梁太首次以自己名義持有。