電視藝員王喜呢輪風頭好勁，好多人都好欣賞佢對捲入廉署調查風波嘅無綫電視業務總經理陳志雲不離不棄，話佢有義氣。近日警務處準備出版一本書，宣傳警員嘅英雄事迹，將十個同袍嘅事迹輯錄出版，其中就有王喜當年勇救幾名半昏迷同袍嘅威水事。
好多人都知王喜做過警察，不過，佢當年嘅英勇事迹你未必知，話說佢八九年仲當緊差，某日有兇徒圖謀殺警，先喺彌敦道一幢大廈十三樓升降機門外兩側堆放易燃物品，再堵塞走廊兩端，之後報警謊稱上址有人爆竊，呃咗一名警長及四名警員到場調查，令佢哋身陷重圍，其中三人包括帶頭嘅警長更畀人熏到半昏迷，咁啱王喜喺附近行必，一聽到召喚即刻衝上去現場，最終救番同袍。
王喜記得當時曾經揹住其中一個女警行十幾層樓梯落樓添。
呢宗事迹涉及機密，或者係咁，過去並冇曝光，今次警隊出書令王喜再成新聞人物，佢將來會唔會粉墨登場做自己呢？