旅遊係本港嘅經濟命脈，啱啱開始嘅一號，係旅發局主席田北俊展開冧莊任期嘅大日子，佢喺電台節目上回顧過去三年嘅不平凡經歷，從「大花筒」講到「零團費」，再講金融海嘯、豬流感，最終都係話畀人聽，旅發局經歷咁多挑戰，都可以力保訪港旅客正增長，唱好旅發局即係唱好自己啫，田少真係鬼馬！
田少話做咗旅發局主席三年，面對過唔少挑戰，最深刻係○七年上任首日，就即刻要處理內地「零團費」強迫旅客購物嘅風波，過去兩年又分別面對金融海嘯及人類豬流感，但係呢啲打擊都無礙訪港人次，三年訪港旅客同旅遊消費都有增長，今年首季嘅旅客數字較去年同期上升百分之十五。
不過，田少最高興嘅都係上場後糾正咗旅發局嘅形象，又因應審計署和立法會帳目委員會報告嘅建議，做咗唔少內部改革，增加問責和透明度，減咗旅發局頭頭嘅薪酬，依家嘅旅發局已經畀人慳家嘅感覺啦！田少猛咁唱好旅發局，足見佢對呢份公職真係好投入。