本文重點
發展局局長林鄭月娥近排奉行曝、曝、曝政策，即係日日都曝光，時時都見報、上電視，政府有三司十二局及N咁多個高官，但喺大氣電波同報端近排最常見嘅人只有林鄭一個，佢雖然話自己唔係「好打得」，但就似乎「好Talk得」，日日都搬啲強拍、市區重建嘅舊料做宣傳。俗語話食多會滯，見多會煩，林鄭嘅車輪攻勢過度，又毫無新意，搞到坊間已經出現反效果！
林鄭初初接受專訪時，有報紙騰出封面，以兩大版位置報道，其後兩間電子傳媒再做專訪，因內容毫無突破，已經冇好似首日咁受重視，過去兩日，佢接受一間電子傳媒嘅專訪又分日出街，雖佢巧花心思，講咗啲「樓換樓」七年樓齡嘅規定，又為日前話市民對地產發展商觀感唔好，累埋官員嘅言論降溫，話市區重建局同地產發展商合作，可以將賣樓賺得嘅收益用於其他舊區重建，但係，聽者已經冇乜感覺。
言論疑踩過界
煲呔曾怕見傳媒，搞到特區政府一眾官員都學晒佢啲衰嘢，唔想面對公眾、面對傳媒，費事講錯嘢捱轟。林鄭接受傳媒專訪係好事，但係話題要有新意、吸引公眾關注都好重要啫，好似佢連日都講強拍、重建，佢唔厭，聽嗰個都厭啦，最怕啲市民患上「林鄭恐懼症」咋。
口痕友都話，林鄭連日接受專訪講嘅內容大都係市區重建局主席張震遠管轄嘅範圍，到底呢啲嘢應該由局長講？定係由張震遠講呢？言下之意就係林鄭踩過界，可見林鄭高調見人、「好Talk得」都唔一定係好事。