喺「福布斯」富豪榜榜上有名嘅中總會長蔡冠深，尋日有「新Baby」誕生。蔡氏家族捐款興建嘅保良局蔡繼有學校新校舍尋日開幕，蔡氏家族空群出動迎接「新寶貝」。蔡冠深如今名成利就並冇忘本，為感激已故父親「海產大王」蔡繼有用心栽培，於是瞓身辦學，望薪火傳承落去。
蔡會長將校園內三幢大樓以媽媽蔡杜佩卿、祖父蔡朝勳同祖母鄭二命名。蔡老太有個孝順仔，全日笑唔停，拉埋六個仔女喺新校舍內左逛右逛。蔡會長嘅太太關穎琴亦拉埋五個仔女撐場，原來細仔喺蔡繼有學校讀小四，尋日着上小童軍制服，企喺大門口迎賓，以行動為爸爸打氣。
合共花費三億元興建嘅新校舍，設施美輪美奐，仲有室內游泳池，有份主禮嘅港大校長徐立之都話正。
蔡繼有學校名氣響噹噹，蔡會長話辦學原則係做到最Top，唔想有負爸爸之名，所以不惜重金禮聘最頂尖老師，音樂科更有大師級人馬，著名大提琴家李垂誼去年起擔任該校音樂顧問。