講真，橫睇掂睇，個新標誌都唔似條龍嘅，舊版飛龍已經畀人話似雞頭嘞，加咗三條綵帶，就更似一隻落荒而逃嘅雞。其實，一條龍夠唔夠威，最緊要睇龍眼，舊版嘅飛龍隻眼仲算炯炯有神，但係新版飛龍隻眼就得番個圓窿，無厘神氣，一啲霸氣都冇，點代表香港精神呀。

講番嗰三條綵帶，鬍鬚曾話喎，藍色同綠色嗰兩條代表藍天同草地，中間紅色嗰條就代表獅子山山脊線，即係代表港人「我做得到」嘅拚搏精神咁話。點知網民就話，條紅帶似足快要沉沒嘅獅子山。喂，咁咪好唔吉利？一句講到尾，條飛龍修改後仲樣衰過以前，政府直情係阿茂整餅，冇嗰樣整嗰樣。叮！

難為鬍鬚曾仲喺度hard sell，話新標誌代表本港五項核心價值，即係自由開放、積極進取、追求卓越、勇於創新同優質生活喎。大佬，自己講係冇用嘅，要人哋睇得明至得o架。嗱，有位內地女遊客話，睇咗成分鐘都唔知嗰幾條線係乜嘢。有個德國旅客更直接，話個設計太虛無，唔明港府做乜使咁多錢搞啲冇人睇得明嘅嘢。唉，香港假假地都係國際都市，搞個冇人睇得明嘅怪物做標誌，羞唔羞家呀！叮！

其實，要發展旅遊業，唔係話畫條龍就得嘅，一定要有好嘅景點、優質嘅服務。現時本港旅遊景點已經少得可憐，仲成日出事故，而且黑店林立，成日宰客，加上空氣質素愈嚟愈差，日日好似沙塵暴咁款，咁嘅環境，就算畫到條龍真係會飛都冇用啦。正如有立法會議員話齋，花咁多錢改標誌，咪等於倒錢落鹹水海。政府與其整色整水，做小修小補，不如起多啲景點，改善空氣質素，吸引多啲人嚟香港好過。

睇見呢個雞唔似雞、龍唔似龍嘅怪物，太一叮諗起一件趣事，當年有人將舊版飛龍改成倒董標誌，曝光率超高，家陣曾蔭權支持度插水，仲慘過當年嘅老懵董，講唔埋有人會有樣學樣，將呢個「落荒而逃嘅雞頭」改成倒曾標誌。