立法會五區補選嘅提名期開始咗一個禮拜，但派人辭職嘅公社兩黨仲係冇乜聲氣幾時遞表。未肯公布參選名單嘅公文袋尋日落觀塘區派單張，又搞「公投」巡遊，由黃大仙啟德花園遊到樂富。
袋巾傑為壯大聲勢，仲搵埋白鴿黨立法會九龍東議員「肥仔明」李華明撐場。肥仔明以個人名義去幫手，但似乎去得不情不願，留咗唔夠十五分鐘就閃人，又冇上巴士去巡遊，就算拉票都唔算叫得起勁。
肥仔明話係喺幾個活動中抽咗少少時間出嚟，係要撐取消功能組別嘅議題。佢叫啲街坊喺五月十六號要投代表泛民嘅候選人一票，仲話代表只係得一個，千祈唔好投錯。
聽聞話會盡力令選舉產生嘅大專生好大機會落呢區選，到時泛民代表有兩個，叫選民點投票先？肥仔明都話唔知可以點算，叫大家去投票就算，死都唔肯叫大家投袋巾傑，睇嚟今次佢幫手都係諗住Hea幫就算！
袋巾傑嘅準備工夫亦明顯Hea做，雖然佢搵白鴿黨幫手算係想修補泛民分裂嘅形象，但今次巡遊竟然揀咗喺表明唔會幫公社兩黨拉票嘅民協票倉東美選區做起點，氣勢當堂跌Watt。正所謂好嘅開始係成功嘅一半，公文袋揀錯起點，唔知會唔會成為補選失敗嘅第一步呢？