點先算食得健康？有機資源中心尋日搞咗個「全城有機日」，教市民點揀有機食品，中心主席兼立法會議員「蘇菲」梁劉柔芬梗有撐場啦，但原來佢除咗飲食健康外，仲好注重環保，佢已經二十年冇飲樽裝水。
蘇菲話唔飲樽裝水，係覺得膠樽始終唔環保。一直秉承「少浪費」原則嘅佢為咗「慳得一樽得一樽」，由二十年前開始自己帶水樽出街，就算迫不得已要買嘢飲，都盡量避免買樽裝飲品，實行為環保盡每一分力。不過，佢強調唔係批評賣樽裝水嘅商人，只係鼓勵大家平時環保啲喎！
佢另外一個環保之道就係低碳飲食。佢話近幾年早餐轉食有機燕麥，再用生果或果仁伴碟，貪佢唔使點煮，既慳資源又可消脂。佢仲將呢個習慣感染埋身為香港足總主席嘅老公梁孔德，佢話老公近年都食多咗田園沙律，實行兩公婆一齊身體力行撐環保。