其實，早喺今年一月，藥廠就發現部分保濟丸產品含西藥，但卻靜雞雞回收，既冇通知衞生署，更冇知會消費者。甚至新加坡政府本月初下令回收，藥廠仲想揞住，同樣冇通知衞生署。卒之到咗前日，衞生署化驗證實隻藥有事，先至宣布無限期禁售。

即係話，香港消費者足足遲咗兩個幾月先至知道保濟丸有問題。喺呢兩個幾月內，消費者不知食咗幾多致癌物質落肚，咁搞法好缺德啫。正如醫藥界人士話齋，藥廠為咗保老字號招牌，隱瞞保濟丸嘅問題，打擊市民嘅信心，令業界大失所望。

話時話，香港生產嘅中成藥出咗事，連新加坡政府都發現，點解港府仲係矇查查，遲咗幾拍先至回收，後知後覺成咁，離唔離譜啲呀？衞生署可能會話，藥廠冇報告，佢哋點知噃。問題係，衞生署係負責監管嘅，下下等人哋報告，即係等於差佬坐喺差館等賊仔嚟自首，有冇再荒謬啲呀？

講到回收就更搞笑，衞生署漏夜宣布禁售，然後就關人個關，既冇詳細解釋，又冇具體安排。市民打電話去藥廠查詢，熱線唔通，有人拎藥去藥店退貨，又被拒絕。總之亂晒大龍，衞生署咁搞法，直情係玩殘市民啫。

業界人士話，香港當局監管中成藥有好大漏洞，根本唔符合國際規範。其實點止好大漏洞，本港嘅中成藥直情係無王管，話就話十一年前已經通過咗《中醫藥條例》，但係衞生署處理註冊慢條斯理，依家仲有幾千種中成藥未註冊。最騎呢嘅係，未註冊嘅中成藥一樣可以喺市面出售，註冊制度形同虛設，實在離譜。衞生署翹埋雙手唔理，又點知邊啲中成藥有問題噃，所以咪搞到次次都後知後覺囉，睇見人哋外國回收嘞，香港先至死死氣跟進，一次係咁，次次都係咁，永遠都唔會長進。叮！

莫講話中成藥無王管，西藥有王管又有乜用呀？好多年前，本港已引入西藥「良好藥品生產規範」制度，咪又係得個講字。呢幾年，發霉藥、過期藥、未註冊藥、貼錯標籤藥遍地開花，事故無日無之，簡直係亂過亂世佳人。

中成藥又好，西藥又好，都係關乎市民生命安全，衞生署居然兒戲成咁，點止係失職，簡直係草菅人命。請問衞生署署長林秉恩，究竟仲要出幾多次事，你先至肯做嘢吖？叮！