港人保育意識抬頭，主管城市規劃嘅工作愈嚟愈富挑戰性，港府尋日公布委任新一屆城市規劃委員會成員，共有六名官方及三十名非官方人士，當中十四個新面孔，任期由四月一日起為期兩年。最引人注目嘅係委員似有年輕化傾向，早前夥拍香港青年聯會主席陳仲尼發起「香港精神大使」計劃嘅梁宏正，同來自近年備受矚目嘅「三十會」成員李律仁都進身城規會，參與香港規劃嘅工作。
梁宏正係立法會議員梁君彥囝囝，現時係家族旗下嘅新興織造廠董事，都有幫手打理家族旗下嘅地產生意。佢入咗都會規劃小組，沙煲兄弟陳仲尼就入咗鄉效及市鎮規劃小組。雖然兩兄弟喺唔同組別，但佢哋正尋找失落嘅香港精神，相信佢哋同後生一代溝通冇難度，事關依家「80後」成日話要保育，佢哋都應該可以喺城規會反映年輕人心聲。
至於大律師李律仁係論政組織「三十會」嘅召集人，呢個組織由一班三十幾歲嘅專業人士組成，勞工及福利局政治助理莫宜端未入政府前就係佢哋嘅會員，今次李律仁再獲政府垂青，可見「三十會」嘅政治力量愈嚟愈高。