官場又有新動態。現年六十歲嘅運輸及房屋局常秘陳鎮源同五十六歲嘅食物及衞生局常秘孔郭惠清即將退休，新一輪高官音樂椅亦開始響起，陳鎮源個位會由現任商務及經濟發展局常秘栢志高調任，現任特首辦常秘謝曼怡就會跳出特首辦，頂番栢志高個位。
今次調動中，比較矚目嘅係特首辦常秘個位，謝曼怡升官之後，現任特首私人秘書麥靖宇升任特首辦常秘。四十七歲嘅謝曼怡署任首長級第八級（D8）嘅位真係好似坐直升機咁，佢○六年初升任行政署長，已經爬咗老公周達明嘅頭，事關當年周達明仲做緊環境運輸及工務局副秘，舊年周達明升做發展局常秘，又贏番只屬D6級嘅太太一次。依家謝曼怡升上D8，兩公婆又追番平。除咗謝曼怡外，同樣升做D8嘅官仲有栢志高同黎太，佢哋都係五十歲，可見高官愈嚟愈年輕。
至於孔太個位就由現任電訊管理局總監黎陳芷娟接任，電訊局嘅空缺則由現任勞工及福利局副秘書長利敏貞頂上。其他調動仲有現任助理政府化驗師劉秋銘接替下月退休嘅丁大倫出任政府化驗師，真係調到大家頭都暈埋。