舊年東亞運動會之後，港府忽然重視體育，仲大手筆注咗三十億元做「藝術及體育發展基金」，立法會尋日討論民政事務時，議員好關注呢筆錢嘅運用，仲問民政事務局局長曾德成點解政府預計基金每年嘅回報率係百分之五？德成局長一聽問題就打個突，忽然拋咗句「我哋民政局淨係識文藝、運動同宗教咋」嚟回應，激到議員O晒嘴，仲畀人寸原來咁多嘢唔識，德成局長真係勇氣可嘉噃！
德成局長經常寸人係人都知，既向記者爆過「我做記者時你都未出世」嘅經典金句，又暗寸過上屆即將改選嘅區議員可唔可以再返番議會，尋日就輪到佢舌戰立法會議員，議員林大輝尋日話，家吓息口咁低，買人民幣債券又得嗰兩厘幾息，投資市場一向可升可跌，政府有乜嘢信心保證體育基金每年穩袋百分之五嘅回報，呢個問題好正常，又係財委會特別會議，議員問數可以話係天公地道嘅事。
德成局長唔知係準備不足、定係想以唔知搪塞問題，竟然話自己淨係識三瓣政策，搞到議員團結一致寸爆佢。口痕友話啫，高官唔識都要死撐或遊花園啦，咁樣答問題都可算少見兼少有，唔知讚佢有勇氣，定係讚佢投資、計數零分好！