科大尋日搞咗個酒會，慶祝佢哋嘅工商管理碩士課程（MBA）獲《金融時報》選為本年度全球嘅第九位，佢哋嘅全球行政人員工商管理碩士課程（EMBA）早已經係全球之冠，今次連MBA都揚威，新任校長陳繁昌（圖）梗係風騷啦，仲話預見科大嘅MBA課程好快就會攀升為世界第一喎。
陳校長對科大有信心都好應分，但佢嘅理由卻唔止咁，佢話自己英文名係Tony Chan，同陳振聰一樣，雖然佢唔識風水，但都可以預見科大好快升做第一。咁都得？
尋日嘅酒會有好多嘉賓出席，包括教育局局長孫明揚、財經事務及庫務局局長陳家強、校董會主席張建東等，做緊科大MBA課程顧問嘅廠商會會長黃友嘉，同「福布斯」富豪方潤華之子、中總副主席方文雄尋日都有到場賀科大，方文雄透露，方家同科大好有淵源，十幾年前科大創校時，佢爸爸都有份幫科大改名。