政府原定三月中要議員拆晒所有街板，讓路畀補選候選人做宣傳，點知建制派議員群起反對，結果上個禮拜，政府就向立法會提交文件，話到明如果現任議員唔使拆街板，又要幫參加補選嘅候選人做宣傳，相關費用要計番落選舉經費啫。話口未完，林公公又反口話唔准藉街板做選舉廣告，仲話一經發現有人違規，就會連通知都唔出就將有關街板移除。

呢個禁令搞到議員無所適從，幾個早前已乖乖拆咗街板嘅議員更大鬧政府後知後覺，政治觸覺不足添。畀佢玩到謝嘅議員話，乜嘢叫宣傳好難界定，譬如喺街板寫「支持公投」或者「反對公投」算唔算呢﹖甚至有人存心惡搞，喺街板上貼個號碼扮候選人，混淆視聽，咁又算唔算呢﹖泛民十八個議員日前已經去信選舉管理委員會主席馮驊，反對唔使拆街板嘅安排，尋日開完飯盒會，決定再入一封信跟進其他問題，睇嚟件事有排亂。