任總尋日寫咗篇《我的退休生活》嘅網誌，佢話學Hea真唔容易，但Hea嘅感覺幾好，經過實踐後，佢已經搵到退休生活嘅平衡點，即係一半時間工作，一半時間繼續Hea，所以嚟緊過冷河期滿之後，都冇諗過去私人機構做全職工作，但會考慮做一啲非執行或顧問嘅工作。

教書打波好寫意

佢透露，好快就會喺中大為全球經濟及金融研究所做一啲金融學術研究工作，又要授課，呢啲工作已經佔用咗佢工作時間嘅七七八八，再加埋舊年十二月開始為中國金融學會擔任執行副會長嘅工作，剩低嘅時間已經唔多，甚至要推咗一啲團體嘅邀請添。

佢話，呢啲工作喺宏觀或微觀方面發揮一下佢嘅金融風險管理同管治上嘅專長，都係社會有啲貢獻，佢仲用「報國」、「講學」嚟形容自己嘅工作性質。任總又話，退休後一樣好似以前咁大清早就起身，然後開住電視睇財經新聞，但精神一定冇以前隨時準備應付事件發生咁緊張，即使遇到突發事件，都只係私下評估、諗吓未來嘅發展。

早餐之後，佢每日都會打吓高爾夫球或做運動，十一點之後先處理電郵、開始工作，日子真係好寫意！