小白觀點:破解可加可減有獎攞
港鐵六月開始加價，據講話係根據一個叫「可加可減」嘅機制依法辦事，唉，其實唔使拎呢個機制做擋箭牌㗎，之前咪有個港鐵高層講到明，佢係「屁股指揮腦袋」，要顧及股東利益，加價當然係天經地義！
當局創造出呢個神秘嘅機制，話就話可以令小市民喺經濟不景時享受車費下調嘅好處，之不過，咁多年嚟，就算係金融海嘯衝擊之下，大家一窮二白，但有見過港鐵減過價咩？
鬼咩，成條數式深到連霍金都唔明解，好嘞，就算條數計咗出嚟有減價空間又點吖，最後唔知點解都未必減得成，之前巴士都試過係咁。記得喺千禧年嗰時，美國數學學會羅列七條千古數學難題，我覺得「可加可減」仲難解過龐加萊猜想，應該列為第八大。如果有人能成功破解，抵畀佢百萬美元獎金兼送多個菲爾茨獎呀！
Blog:http://sunsiupak.blogspot.com
阿豪觀點:機制搵笨專掠蟻民
港鐵宣布按票價可加可減機制，將於六月加票價，整體加幅百分之二點零五，部分路線最多加到去百分之七點零五。喂，唔係啩，又話可加可減機制，幾時實牙實齒減過價呀？唔怪得畀人寸佢係「可加難減」啦！
呢個機制一睇就知搵笨啦！因為只係考慮通脹率、運輸服務業工資指數及生產力因素嘅變動呢三個因素，市民嘅承擔能力係唔包括在內嘅，換言之你班蟻民捱貴車苦過dee dee，唔該貴客自理嘞。就算唔計乘客嘅負擔能力，一項服務要加價，前提係咪該顧客覺得佢哋嘅服務物有所值呢？咁點解冇包括港鐵服務有幾多延誤等數據先？
真係愈諗愈唔明，點解最低工資水平又要考慮咁多嘢，包括埋個社會嘅和諧呢？港鐵加價加重小市民負擔，貧賤夫妻百事哀，咁你唔好加價啦笨！
Blog:http://lukchiho.blogspot.com
網友觀點
大口仔：可加可減係乜機制嚟㗎，點解利益多數唔歸小市民嘅？
小豬：一毫子都未減過呀，仲加，唔好去搶劫？
狒狒：港鐵帶頭，其他公共交通工具唔使好耐實會有樣學樣！
甘仔：揸住港鐵股票嘅股民，加價可能係一個好消息。