建築署日前回應立法會議員書面質詢，話本年度頭十一個月政府部門維修工程出現延誤嘅有一百五十五項，其中二十七項延誤一至三個月，有十三項更加超過限期三個月都未搞掂。

政府做嘢有名例遲，延誤當食生菜，遲得咁離譜就認真誇張。其實仲有更誇張㗎，呢百幾個個案只涉及承辦商推卸責任唔認數引起嘅延誤，因為政府部門擺烏龍，工程委託報告指示寫到唔清唔楚，又或者因維修場地本身嘅限制，需要延長施工時間嘅個案，原來唔算延誤㗎。係咪絕世好橋呢？

叮！照建築署嘅計法，好似上次導致冧鐵閘壓死人嘅政府內部延誤，都屬於正常啦？舊年五月，社署轄下紅磡一間庇護工場一個成二百磅重嘅鐵閘，懷疑因為軸心長期生銹斷裂，突然冧落嚟，壓死一名外判清潔女工。當局承認事發前半年已經發現鐵閘有問題，社署要求建築署更換，但咁簡單嘅工程，有關部門拖足半年都未成事，卒之搞出人命。

同樣離譜嘅係，對於涉及政府部門延誤嘅數字，當局居然攞唔出嚟。你叫市民點判斷有關部門嘅表現？點促進佢哋提高施政效能？當局又有乜可能防止悲劇重演吖？

叮！話到尾，當局根本就唔想披露呢啲數字，因為無論工程大細，涉及政府因素嘅延誤實在太普遍。呢，路政署喺荔枝角曼克頓山平台起一條連接美孚巴士總站嘅天橋，○六年已經動工，但做吓停吓，起咗三年幾都未搞掂，市民日日要兜個大圈至去到巴士站。學市民話齋，拖咁耐不如唔起好過。

細工程一拖再拖，大工程仲弊，隨時拖十年八載不特止，仲拖到工程費激增，無端端嘥多一大筆公帑。嗱，好似昂船洲大橋咁，原本計劃○八年中落成，結果遲咗一年幾，到舊年十二月底至通車，造價嚴重超支近四成，到頭來又係納稅人埋單。

最搞笑就係，如果準時落成，呢條橋本來會係全球第一長嘅斜拉橋。點知，人哋蘇州有條蘇通大橋夠快手，早半年通車，香港連做半日一哥都冇機會。

未拍板嘅項目議而不決，得個傾字，甚至胎死腹中，好似香港仔漁人碼頭咁；開咗工嘅項目就唔嗲唔吊，闊佬懶理。計太一叮話齋，政府部門效率九流，卸責一流。乜乜中心物物港唔使諗嘞，繼續做大隻講啦。叮！