喺東亞運後，民政事務局局長曾德成好似High過頭咁，話香港下一個目標係要申辦亞運，點知佢可能返去攝高枕頭諗清楚後發覺自己吹大咗，所以早前喺網上專欄度縮沙，話香港要申辦亞運有「三大困難」。言猶在耳，佢尋日又再轉軚，喺網上專欄話香港可以邀請鄰近城市協辦亞運，一時一樣嘅態度令人無所適從。
德成局長前幾日至大呻申辦亞運競爭大，耗資仲大，講到鬼咁悲觀，但尋日又再「打倒昨日的我」，大力吹噓香港城市基本建設做得好，所以申辦亞運都唔使增建太多基建項目，加上香港同珠三角嘅關係日益密切，高鐵、港珠澳大橋相繼落成，香港可以邀請鄰近城市協辦亞運，之後仲講到成功在望咁，話香港申辦亞運蘊藏無窮機遇，要大家將申辦亞運嘅事放喺加快香港同周邊地區未來發展嘅大背景下一併作考慮喎。
其實，申辦亞運咁大件事，唔係德成局長一個人可以話晒事，但佢對於申辦與否舉棋不定，仲亂吹一通，搞到精神分裂咁，倒不如快啲進行公眾諮詢，了解吓市民大眾意向仲實際啦！